Mes financimit nga buxheti i shtetit, huamarrjes, koncesioneve dhe ndihmës nga Bashkimi Europian, Ministria e Infrastrukturës parashikon që në katër vitet e ardhshme të investojë 8 miliardë euro në infrastrukturë. Shifra që zbulohet në strategjinë sektoriale të transportit dhe planit të veprimit 2030 përbën 10-fishin e buxhetit të parashikuar nga qeveria për infrastrukturën dhe energjinë për këtë vit. Dokumenti i hedhur për konsultim publik thotë se zbatimi i kësaj strategjie kërkon një kuadër financiar të qëndrueshëm, të parashikueshëm dhe me orientim drejt prioriteve, një prej të cilëve është edhe integrimi i rrjetit rrugor, hekurudhor dhe energjitik me rrjetin TEN-T të Bashkimit Europian. Megjithëse shifra prej 8 miliardë eurosh në katër vite është në nivelet e një buxheti vjetor total të qeverisë, Ministria e Infrastrukturës thotë në dokument se strategjia është brenda parametrave fiskalë dhe promovon një kombinim të balancuar mes financimit shtetëror, kredive dhe granteve nga institucionet ndërkombëtare dhe koncesioneve.