Shqipëria do të presë vitin e ardhshëm plot 8 mijë trupa amerikanë në kuadër të një stërvitjeje të përbashkët dhe që do dislokohen në disa reparte të ndryshme të vendit. Lajmin e ka bërë publik vetë ministrja e Mbrojtjes, Olta Xhaçka, në fjalën që ka mbajtur në Komisionin e Sigurisë Kombëtare, ku ka paraqitur buxhetin për vitin e ardhshëm. Ministrja nuk e dha kohën se kur do të zhvillohet kjo stërvitje, por u shpreh se ishte stërvitja më e madhe që kishte kryer ndonjëherë. Sakaq Defender 2020 e parashikuar për në muajin mars 2020 në pjesën e Europës Lindore dhe Qendrore u anulua për shkak të shpërthimit të Covid-19. Ndërkohë, trupat shqiptare do të vijojnë misionet jashtë vendit; në Afganistan, Bosnje-Hercegovinë, në misionin KFOR të NATO-s në Kosovë; në operacionin ushtarak të NATO në Letoni, në Sudan, Irak, por edhe në Ngushticen e Hormuzit në kufi me Iranin në krah të Shteteve të Bashkuara të Amerikës.