Në kuadër të 75-vjetorit të krijimit të NATO-s, Ministri për Europën dhe Punët e Jashtme, Igli Hasani ka deklaruar se ky vit paraqet një rëndësi speciale për Shqipërinë, pasi mbushen 15 vjet nga anëtarësimi i vendit në Aleancë. Në videomesazhin e tij nga Brukseli Hasani shprehet se 75 vitet e fundit janë një dëshmi e fuqisë dhe dhe qëndrueshmërisë së NATO-s, duke shtuar se përballë agresionit të Rusisë kundër Ukrainës dhe përshkallëzimit të kërcënimeve globale të sigurisë, rëndësia e NATO-s është më e theksuar se kurrë. E forcuar më tej nga bashkimi i kohëve të fundit i aleatëve tanë më të rinj: Suedisë dhe Finlandës, NATO sot qëndron si një garantues i palëkundur i sigurisë kolektive për të gjithë aleatët e saj, e gatshme të qëndrojë e tillë edhe për shumë dekada të tjera. Anëtarësimi në NATO për ne nuk ishte thjesht për të përfituar siguri; ishte gjithashtu për rrënjosjen e vendit tonë mes familjes demokratike, perëndimore të kombeve.