Një gjykatë në Moskë ka filluar të shqyrtojë një çështje penale kundër një 72-vjeçari amerikan të akuzuar se ka luftuar si mercenar për Ukrainën, njoftoi të premten agjencia ruse e lajmeve RIA. Burri, i identifikuar si Stephen James Hubbard, u vendos në paraburgim për gjashtë muaj, tha RIA. Raporti nuk specifikoi se kur dhe ku u arrestua Hubbard. Agjenia e lajmeve Reuters nuk ka qenë në gjendje të kontaktonte menjëherë me avokatin e tij. Ambasada e SHBA-së në Rusi dhe Ministria e Punëve të Jashtme të Ukrainës në anën tjetër, nuk iu përgjigjën menjëherë kërkesave për koment. Akuzat për veprimtari mercenare shoqërohen me një dënim nga shtatë deri në 15 vjet burg në Rusi. RIA tha se Hubbard, një banor i Michiganit, ishte zhvendosur në Ukrainë në vitin 2014 dhe kishte jetuar për një kohë të gjatë atje me një grua. Ai kishte qenë i vendosur në qytetin e Iziumit dhe i ishte bashkuar forcave ukrainase pas fillimit të luftës. Sipas agjencisë ruse RIA, ai ishte zënë rob nga rusët gjatë luftimeve.