Të dhënat e Instat mbi shpenzimet mesatare të familjeve shqiptare tregojnë se në kategorinë e ushqimeve dhe pijeve joalkoolike, shpenzimet më të mëdha përgjatë vitit të kaluar kanë shkuar për perime. Sipas raportit, 19.5 për qind e shpenzimeve shkuan për këtë grup, ndjekur nga 19 për qind për mish dhe nënprodukte të tij dhe me 15.5 për qind bukë e drithëra. E thënë më thjesht, për çdo 100 lekë të shpenzuar, një familje me tre anëtarë në Shqipëri 20 lekë i shpenzon perime, 19 lekë për mish dhe 15 lekë për bukën dhe drithërat. Statistikat tregojnë se në vitin 2024, shpenzimet mesatare mujore për një familje të përbërë nga tre anëtarë vlerësohen në 93 mijë lekë, ose pak më shumë se 900 euro. Shpenzimet gjithsej për konsum janë rreth 700 milionë euro, ndërsa rritjen më të madhe nga viti në viti e ka grupi i mobilimit dhe mirëmbajtjes së banesës.