Apple është gjobitur me 500 milionë euro dhe Meta me 200 milionë euro, të mërkurën, pasi rregullatorët antitrust të Bashkimit Europian vendosën sanksionet e para sipas legjislacionit historik që synon të frenojë fuqinë e atyre që njihen si Big Tech. Gjobat e BE-së mund të nxisin tensionet “me presidentin e SHBA-së, Donald Trump, i cili ka kërcënuar se do të vendosë tarifa ndaj vendeve që penalizojnë kompanitë amerikane. Sanksionet vijnë pas një hetimi njëvjeçar nga Komisioni Evropian, ekzekutivi i BE-së, nëse kompanitë janë në përputhje me Aktin e Tregjeve Dixhitale që synon të lejojë edhe rivalë më të vegjël në tregje të dominuara nga kompanitë më të mëdha. Apple tha ndërkohë se do të sfidonte gjobën e BE-së. “Njoftimet e sotme janë një shembull tjetër se Komisioni Evropian ka vendosur në shënjestër në mënyrë të padrejtë Apple në një seri vendimesh të këqija për privatësinë dhe sigurinë e përdoruesve tanë, të këqija për produktet tona dhe na detyrojnë që të japim teknologjinë tonë falas”, tha Apple në një deklaratë.