Vendet anëtare të NATO-s kanë dalë me një deklaratë të përbashkët pas samitit të zhvilluar në Ankara, ku kanë rikonfirmuar angazhimin e tyre të plotë ndaj parimit të mbrojtjes kolektive të parashikuar në Nenin 5 të Traktatit të Uashingtonit. Në deklaratë theksohet se “një sulm ndaj një aleati konsiderohet sulm ndaj të gjithë aleatëve”. Për t’iu kundërvënë kërcënimit afatgjatë që Rusia paraqet për sigurinë dhe stabilitetin euro-atlantik, si edhe kërcënimit të vazhdueshëm të terrorizmit, aleatët thonë se po zbatojnë angazhimin për mbrojtjen e miratuar në Hagë, ku janë rritur investimet për nevojat bazë të mbrojtjes me më shumë se 139 miliardë dollarë. Po ashtu, në samitin e Ankarasë u bënë të ditura kontrata të reja prokurimi me një vlerë që tejkalon 50 miliardë dollarë. “Sot, në Ankara, ne shpallim më shumë se 50 miliardë dollarë prokurime të reja dhe angazhohemi të zgjerojmë kapacitetin e përbashkët prodhues, si edhe të punojmë me industrinë për të përshpejtuar inovacionin. Ne do të vazhdojmë punën për të eliminuar pengesat në tregtinë e pajisjeve të mbrojtjes mes aleatëve dhe për të shfrytëzuar partneritetet e NATO-s në mënyrë që të maksimizojmë kapacitetin industrial të mbrojtjes dhe bashkëpunimin.”, thuhet në deklaratë. Sa I takon Ukrainës, aleatët zotohen se do tëofrojnë 70 miliardë euro në pajisje ushtarake, ndihmë dhe trajnim për Kuevin. “Për këtë qëllim, ne mirëpresim vendimin e Bashkimit Evropian për t’i ofruar Ukrainës financim shumëvjeçar përmes Kredisë për Mbështetjen e Ukrainës.”, thuhet në deklaratë. Aleatët ritheksojnë se Irani nuk duhet të zotërojë kurrë armë bërthamore dhe i bëjnë thirrje Iranit të respektojë plotësisht lirinë e lundrimit në Ngushticën e Hormuzit.