Një ngjarje e rëndë ka tronditur qytetin e Shkodrës, pasi një tjetër grua i ka dhënë fund jetës duke u hedhur nga Ura e Bunës. Këtë të shtunë, rreth orës 16:25 minuta, shërbimet e Policisë së Shkodrës u njoftuan se një shtetase është hedhur në ujërat e lumit Buna. Bëhet fjalë për 63-vjeçaren Shefike Osja, e cila banonte në lagjen ‘Dobraç’. Nga hetimet e deritanishme dyshohet se 63-vjeçarja kohët e fundit vuante nga depresioni, duke qenë në gjendje të rënduar psikologjike. Punonjësit e Policisë u futën në ujërat e lumit Buna me një varkë dhe nisën kërkimet, menjëherë pas marrjes së njoftimit. Nga këqyrja paraprake e trupit të pajetë, i cili është dërguar në morg, nuk janë konstatuar shenja dhune, ndërkohë grupi hetimor, në drejtimin e prokurorisë vijon punën për zbardhjen e plotë të rrethanave të rastit të rëndë. Kjo është ngjarja tragjike e dytë brenda pak kohësh në lumin Buna. Më 2 maj e gjithë shoqëria shqiptare u trondit kur Alma Arrazi u hodh nga Ura e Bunës, bashkë me 3 fëmijët e mitur. Për këtë ngjarje është arrestuar bashkëshorti Erdgys Arrazi, i akuzuar se shtyu drejt vetëvrasjes Almën, pasi ai kishte një lidhje jashtëmartesore.