Qeveria ka arkëtuar më shumë se 600 milionë euro shtesë nga taksat dhe tatimet deri në fund të nëntorit të këtij viti. Të dhënat paraprake të Ministrisë së Financave tregojnë një rritje me 12 për qind, në krahasim me të njëjtën periudhë të një viti më parë. Të ardhurat e siguruara nga tatim-fitimi i bizneseve u rritën me 25 për qind, duke sugjeruar se marzhi i fitimit të tyre në këtë periudhë është zgjeruar në krahasim me të njëjtën periudhë të një viti më parë. Nga tatimi për të ardhurat personale janë arkëtuar gati 500 milionë euro, ose 28 për qind më shumë se e njëjta periudhë e vitit të kaluar. Rritja argumentohet edhe me politikën agresive të qeverisë në rritjen e pagave, duke rritur automatikisht tatimet në këtë grup të ardhurash. Ndërkohë, të ardhurat doganore janë gati 2 për qind më pak se ato të vitit të kaluar, duke reflektuar stabilizimin e çmimeve në tregjet ndërkombëtare.