Ryanair mund të anulojë deri në 600 fluturime në ditë, javën e ardhshme, për shkak të grevave të kontrollorëve të trafikut ajror në Francë, ka pretenduar linja ajrore. Drejtori ekzekutiv i kompanisë, Michael O’Leary, ka përsëritur kërkesat drejtuar BE-së për të mbrojtur kompanitë dhe për të minimizuar problemet e shkaktuara nga grevat. Grevat nënkuptojnë se fluturimet nga Mbretëria e Bashkuar në Francë dhe destinacione pushimesh si Spanja, Italia dhe Greqia do të preken, pasi këto rrugë kalojnë mbi Francë. Sindikata më e madhe franceze e kontrollit të trafikut ajror, ka njoftuar një grevë që do të mbahet nga 7 deri më 10 tetor, duke reduktuar kapacitetin në të gjithë hapësirën ajrore të Evropës Perëndimore. Kompanitë ajrore nuk do ta dinë saktësisht se sa fluturime duhet të anulojnë derisa veprimi të konfirmohet dhe greva të ketë nisur, por O’Leary tha se pret që Ryanair të anulojë deri në 600 fluturime çdo ditë, duke prekur deri në 100,000 pasagjerë. Kompanitë e tjera ajrore ende nuk kanë dhënë parashikime. Rreth 30 fluturime të Ryanair u anuluan vetëm të enjten, duke përfshirë disa fluturime mbi Francë, për shkak të një greve nga sindikata më të vogla. Ndërkohë që anulime e vonesa pati edhe dy javë më parë gjatë një tjetër greve. Në një deklaratë të postuar në internet të mërkurën në mbrëmje, O’Leary tha: “Nuk mund të kemi një situatë në BE ku kemi një treg të vetëm, por e mbyllim atë treg sa herë që francezët bëjnë grevë. Ata kanë të drejtë të bëjnë grevë, por nëse fluturimet do të anulohen, ato duhet të jenë fluturime që mbërrijnë dhe dalin nga Franca. Nuk duhet të preken trajektoret e tjera”, tha ai.