Trupat ruse kanë kryer sulme të reja gjatë natës ndaj Ukrainës, duke përdorur 12 dronë iranianë, njoftoi Shtabi i Përgjithshëm i ushtrisë ukrainase të hënën. Ushtria tha se të gjithë dronët “janë shkatërruar nga sistemet e mbrojtjes kundërajrore”. Ushtria ukrainase tha se në 24 orët e shkuara ndërkohë janë janë zhvilluar afër 60 beteja në vijat e frontit në Kupjansk, Limansk, Avdijivka, Marinsk, Shahtarsk dhe Zaporizhja. “Si rezultat i sulmeve, fatkeqësisht, ka të vdekur dhe të plagosur në mesin e civilëve”, thuhej në njoftimin e Shtabit të Përgjithshëm. Sipas Ukrainës, Rusia ka sulmuar ndërtesa dhe infrastrukturë civile të cilat janë shkatërruar ose dëmtuar. “Në drejtim të Bahmutit, në lindje të Ukrainës, armiku pa sukses tentoi të rimerrte pozicionet e humbura afër Andrijivkës. Forcat ukrainase vazhduan operacionet e tyre sulmuese në jug të Bahmutit, duke i shkaktuar humbje në njerëz dhe pajisje armikut”, shtoi ushtria ukrainase. Ditë më parë, Instituti amerikan për Studime të Luftës raportoi se trupat ukrainase kanë përparuar afër Bahmutit dhe kanë vazhduar operacionet e tyre sulmuese në jug të rajonit të Zaporizhjës.