Pandemia e Covid-19 ka ndikuar ndjeshëm në rritjen e vdekshmërisë në vend, duke e çuar në rekorde historike të larta. Në vitin 2020 kanë humbur jetën në vend rreth 28 mijë persona, behet e ditur nga te dhenat zyrtare qe ka publikuar “Monitor”. Në krahasim me vitin 2019 dhe me mesataren e periudhës 2015-2019, janë rreth 6 mijë jetë të humbura më shumë. Historikisht në vend janë shënuar midis 20-22 mijë vdekje në vit, ndërsa kapërcimi në 2020-n është shumë i fortë siç duket edhe nga grafiku “Numri i vdekjeve në vite, 1990-2020”. Faktori i vetëm i ri, që mund të shpjegojë shtimin e ndjeshëm të vdekjeve, është pandemia, ashtu si në të gjithë Europën. Në raportimet zyrtare jepen vetëm vdekjet në spitale, që ishin të konfirmuar me tampon, ndërkohë që ka të tjerë, që edhe pse mund të kenë humbur jetën nga Covid-19, nuk janë të raportuar të tillë, pasi nuk kishin konfirmin me tampon. Tendencën e rritjes së vdekjeve si arsye e epidemisë së koronavirusit e konfirmoi me heret gjatë nëntorit dhe Alban Ylli, eksperti i Institutit të Shëndetit Publik. “Arsyeja kryesore e rritjes së vdekjeve është Covid. Tipike si në gjithë vendet e tjera”, ka deklaruar ai.