Buxheti i vitit të ardhshëm, i cili po shqyrtohet online në Kuvend, parashikon sipas draftit zyrtar të bërë publik, gjashtë projekte konçesionare me vlerë totale rreth një miliardë euro, duke zënë 4.5 për qind të Produktit të Brendshëm Bruto. Për pesë prej kontratave të konçesioneve është zhvilluar gara e tenderit dhe janë shpallur fituesit. ‘Open Data’ ka realizuar një hulumtim se ku janë përqëndruar projektet e vitit të ardhshëm dhe si do të funksionojnë ato. Për konçesionin e ndërtimit dhe rehabilitimit të segmentit rrugor Kashar-Pezë-Lekaj, konsorciumi fitues është shpallur më 13 shkurt të vitit 2023. Sipas dokumentit standard të tenderit ky segment do të jetë me pagesë nga përdoruesit e rrugës me një tarifë të parashikuar rreth 0.025 Euro për kilometër. Shteti do të jetë garant për Koncesionarin, nëse ky i fundit nuk arrin të plotësojë nivelin e të ardhurave fillestare të planifikuara. Vlera në total e parashikuar për Garancinë është 48.5 milionë Euro, për gjithë kohëzgjatjen, ndërkohë të ardhurat e parashikuara për këtë koncesion janë 2.23 miliardë Euro.