Rreth 520 milionë fëmijë në mbarë botën kanë jetuar në zona konflikti gjatë vitit 2024, 47 milionë më shumë se një vit më parë. Kjo është shifra më e lartë e regjistruar që nga viti 2005, sipas raportit të organizatës ndërkombëtare Save the Children. Sipas raportit, një në pesë fëmijë në botë ka jetuar në një konflikt aktiv gjatë vitit të kaluar. Vetëm në vitin 2024 janë regjistruar 41.763 shkelje të rënda kundër fëmijëve, një rritje prej 30 për qind krahasuar me vitin 2023, duke e bërë atë vitin me numrin më të lartë të rasteve të dokumentuara. Më shumë se gjysma e incidenteve janë shënuar në territoret e pushtuara palestineze, Republikën Demokratike të Kongos, Nigeri dhe Somali. Në total, janë identifikuar 61 konflikte të armatosura në vende të ndryshme, numri më i madh që nga viti 1946.