Ministrja e Shëndetësisë, Ogerta Manasirliu bëri të ditur se ka përfunduar procesi i vaksinimit të mësuesve dhe mjekëve. Në një lidhje për emisionin ‘Breaking’ në Top Neës, ministrja theksoi se brenda muajit maj në vendin tonë do jenë 500 mijë të vaksinuar. “Kemi përfunduar vaksinim e mësuesve në arsimin publik dhe jo publik. Kemi vijuar me vaksinimin e stomatologëve gjithashtu, duke bashkëpunuar me urdhërat përkatës. Sot pritet të kapim 200 mijë vaksinime, në kuadër të procesit të vaksinimit. Vaksinimi është jetik, do i ftoja të dëgjonin shkencën, jo gjithollogët. Duhet të fokusohemi të fjalët e ekspertëve tanë. Jemi në 192 mijë vaksine të kryera deri dje. Ne, ashtu siç e kemi përcaktuar, kemi ambicien që brenda muajit maj të shkojmë në 500 mijë vaksinime”. Në të gjithë Shqipërinë ka nisur procesi i vaksinimit sipas përcaktimit të kategorive. Të parët ishin të moshuarit mbi 80 vjec e më pas i gjithë rrjeti shëndetësor në vend. Si kategori tjetër që u përfshi në vaksinim ishin gazetarët e terrenit dhe efektivët e policisë.