Deri në orën 14:00 të kësaj të hëne në vend janë raportuar 10 vatra zjarri, nga të cilat 5 vijojnë të jenë aktive, 4 nën mbikëqyrje dhe 1 është shuar plotësisht. Situata paraqitet më problematike në qarkun Dibër, ku vijojnë aktive vatrat në Vajkal, Lundre, Ballenjë, si dhe në brezin Bershi–Kurdari–Patinë. Në Lundre, për shkak të erës dhe sipërfaqes së konsiderueshme pyjore, janë angazhuar 20 forca ushtarake dhe një helikopter i Forcës Ajrore. Sipas autoriteteve, aktualisht nuk ka rrezik për zonat e banuara. Në Vajkal po operojnë 20 forca zjarrfikëse dhe 20 efektivë të Forcave të Armatosura, ndërsa në Ballenjë zjarri vijon në një sipërfaqe pyjore brenda një zone të mbrojtur. Edhe në Dajt, në drejtim të Qafë-Priskës, vijon operacioni për shuarjen e flakëve. Edhe në këtë zonë, nuk ka rrezik për banesat. Në Korçë, vatra në Qafën e Lugut është vënë nën kontroll. Ndërkohë, në Elbasan zjarri në malin e Dardhës është shuar plotësisht, ndërsa në malin e Qukësit vijon mbikëqyrja. Në total, në mbështetje të operacioneve kundër zjarreve janë angazhuar 70 forca ushtarake dhe një helikopter i Forcës Ajrore.