Sipas inteligjencës së Koresë së Jugut, gati 5,000 koreano-veriorë janë vrarë ose plagosur duke luftuar përkrah trupave ruse kundër Ukrainës. Vlerësimi vjen dy ditë pasi Koreja e Veriut konfirmoi për herë të parë se kishte dërguar trupa luftarake për të ndihmuar Rusinë që të rimarrë pjesë të rajonit të Kurskut, që u morën nën kontroll nga trupat ukrainase pas një ofensive të befasishme që nisi gushtin e vitit të kaluar. Në një takim informativ të komisionit parlamentar me dyer të mbyllura, shërbimi i inteligjencës u tha politikanëve se Pheniani kishte regjistruar 4,700 viktima në luftime, mes tyre 600 vdekje të sigurta.