Presidenti amerikan, Donald Trump, kërcënoi me sulme ushtarake kundër Iranit pasi autoritetet vranë mijëra njerëz gjatë një shtypjeje brutale të protestave antiqeveritare. Trump së fundi është tërhequr nga ky kërcënim, por nuk e ka përjashtuar mundësinë e një sulmi ndaj Republikës Islamike. Ekspertët thonë se grumbullimi ushtarak, si dhe stërvitjet e planifikuara detare të SHBA-së në rajon, rrisin presionin ndaj Iranit dhe ofrojnë më shumë opsione sulmuese ushtarake nëse Uashingtoni vendos ta sulmojë Iranin. Ekspertët thonë se mundësia për sulm amerikan në irak është shumë e madhe duke patur parasysh grumbullimin shumë agresiv ushtarak në gjirin persik. Aeroplanmbajtësja USS Abraham Lincoln dhe tre luftanije të tjera sulmuese janë nisur drejt Lindjes së Mesme, me më shumë se 5.000 trupa në bord. Komanda Qendrore amerikane ka thënë se avionët luftarakë F-15E Strike Eagle, janë dislokuar në rajon. Ndërkaq, Forcat Ajrore amerikane kanë thënë se se do të nisin një stërvitje disaditore ushtarake në mbarë Lindjen e Mesme “për të demonstruar aftësinë për të dislokuar, shpërndarë dhe mbajtur fuqinë luftarake ajrore”. Ky aktivitet ngjason me atë të vitit të kaluar, kur SHBA-ja dërgoi asete ushtarake në rajon para se Izraeli, dhe më pas Uashingtoni kryen sulme ajrore, duke shënjestruar objektet bërthamore të Iranit.