Gjykata Kushtetuese ka kërkuar më shumë kohë për të dhënë një vendim përfundimtar në lidhje me kërkesën e Qeverisë për masën e pezullimit të zv.Kryeministres dhe ministres së Infrastrukturës, Belinda Balluku. Trupa me tetë gjyqtarë u mblodh këtë të mërkurë dhe pas një diskutimi që ka zgjatur rreth 90 minuta ka vendosur që të marrë më shumë kohë për t’u shprehur me një vendimmarrje përfundimtare, që do të shuante debatin nëse masa e pezullimit e vendosur ndaj Ballukut nga Gjykata e Posaçme është shkelje kompetencash të pushtetit ekzekutiv apo jo. Kërkesa e Qeverisë për masat e vendosura ndaj Ballukut kanë mbërritur në Kushtetuese rreth pesë javë më parë. Ndërkohë, të mërkurën do të mblidhet Këshillit i Mandateve në Kuvend, ku do të diskutohet kërkesa e SPAK për heqjen e imunitetit të Belinda Ballukut dhe autorizimin e SPAK për arrestimin e mundshëm të saj. Kjo kërkesë është depozituar nga SPAK në Kuvend pas vendimit të Gjykatës Kushtetuese, që më 22 dhjetor të vitit të kaluar pezulloi pezullimin e caktuar ndaj zv.Kryeministres nga ana e Gjykatës së Posaçme.