Pesë aksidente rrugore kanë ndodhur këtë të hënë ne vend, me pasojë disa persona të plagosur. Në aksin rrugor Fier–Lushnjë, pranë fshatit Vajkan, dy automjete janë përplasur me njëra-tjetrën dhe kanë përfunduar në kanalin anësor të autostradës. Përplasja e fortë ka shkaktuar plagosjen e katër personave, të cilët janë transportuar me urgjencë drejt Spitalit Rajonal të Fierit. Sipas të dhënave paraprake, të plagosurit janë jashtë rrezikut për jetën. Si pasojë e aksidentit, njëra prej korsive u bllokua, duke shkaktuar radhë kilometrike automjetesh në këtë aks, i cili gjatë sezonit veror ka një fluks të lartë qarkullimi. Ndërkohë brenda pak minutave nga aksidenti i parë, një tjetër përplasje ka ndodhur në autostradën Durrës-Tiranë, në afërsi të Sukthit. Në ngjarje janë përfshirë shtatë automjete. Fillimisht janë përplasur dy makina, ndërsa pak më tej pesë automjete të tjera janë përfshirë në një përplasje zinxhir.