Tre shtetas shqiptarë janë dënuar me nga 15 vite burg secili nga Gjykata Penale e Kantonit Basel-Landschaft, në Zvicër. Sipas mediave zvicerane, të denuarit, përkatësisht të moshave 31, 32 dhe 34 vjeç, kishin tentuar në vitin 2022 të transportonin rreth gjysmë ton kokainë përmes kontejnerit, të fshehur në thasë me kafe. Tre shqiptarët u dënuan për shkelje të rënda të Ligjit për Narkotikët. Sipas aktakuzës, ata bënë përgatitje për të poseduar dhe transportuar një sasi të madhe droge. Përpjekja e tyre për të gjetur kontejnerin nga Brazili në ambientet e kompanisë së transportit Sëissterminal në Frenkendorf, dështoi pavarësisht disa përpjekjeve. Ngarkesa u zbulua më vonë në një tjetër fabrikë në Romont. Gjykata i shpalli fajtorë shtetasit shqiptare për trafik ndërkombëtar droge dhe vendosi dënimin me nga 15 vite burg për secilin.