Gazment Bardhit ju bashkuan 42 deputetë në mbledhjen e thirrur prej tij në cilësinë e kreut të grupit parlamentar të Partisë Demokratike. Edhe pse statuti i miratuar në Kuvendin Kombëtar të kryesuar nga Basha dhe Parlamenti nuk ja njohin më këtë funksion, duket se deputetët kanë një tjetër qasje. 21 deputetët e Foltores së Sali Berishës ju bashkuan Gazment Bardhit, edhe pse ky i fundit ka pasur gjatë muajve të fundit deklarata kontradiktore për vetë Berishën dhe deputetët që e përkrahin atë. Shkrirja e akujve me Berishën, afroi në tryezën e Bardhit edhe partitë aleate, ku të pranishëm në mbledhje ishin Fatmir Mediu i Partisë Republikane, Agron Duka i Partisë Agrare Ambjentaliste, Vangjel Dule i PBDNJ – së dhe Dashamir Shehi i Lëvizjes për Zhvillim Kombëtar. Nga aleatët vetëm PDIU qëndron besnike e kryetarit të Partisë Demokratike, Lulzim Basha, pas përplasjes që patën me Berishën në zgjedhjet lokale të 14 majit për kandidimin e Fredi Belerit në bashkinë e Himarë. Shpëtim Idrizi, Mesila Doda, Nusret Avdullaj dhe Gëzim Ademaj e bojkotuan mbledhjen e thirrur nga Gazment Bardhi.