Policia Rrugore ka shtuar kontrollet në të gjitha zonat bregdetare, turistike dhe qendrave të mëdha të banimit për shkak të fluksit të lartë të automjeteve me qëllim parandalimin e aksidenteve rrugore. Si rezultat i monitorimit në të gjitha akset rrugore, gjatë javës që lamë pas janë pezulluar 154 leje drejtimi, për shpejtësi mbi normat e lejuara, për drejtim të mjetit në efektin e alkoolit dhe për qarkullim në sens të kundërt. Ndërkohë janë arrestuar 41 drejtues mjetesh, për drejtim të mjetit në gjendje të dehur dhe për drejtim të mjetit pa leje drejtimi. Gjithashtu, në të gjithë vendin janë vendosur mbi 24 mijë masa administrative, për shpejtësi tej normave të lejuara, përdorim të celularit gjatë drejtimit të mjetit, mospërdorim të rripit të sigurimit, parakalime të gabuara, për mosvendosje të kaskës mbrojtëse, për manovra të rrezikshme në rrugë si dhe për shkelje të tjera të Kodit Rrugor.