Redjan Rraja dhe Eldi Çala, dy të burgosurit që ndodhen në regjimin e fortë të burgjeve 41 biss kanë nisur një grevë urie, duke refuzuar vaktet e përgatitura nga stafi i burgut. Dy të burgosurit për krime të rëndë pretendojnë se zyrtarët e burgjeve nuk e kanë mbajtur fjalën për të vendosur një televizor dhe sipas burimeve për Top Channel, për këtë arsye kanë vendosur të ndërmarrin këtë hap ekstrem. Redjan Rraja u la në burg në nëntor të vitit 2019 me vendim të gjykatës së Apelit për krime të rënda, si i akuzuar për atentatin ndaj prokurorit të Durrësit Arjan Ndoj, Landi Muharremit dhe Andi Malokut, ngjarje kjo e ndodhur më datë 1 nëntor të po atij viti, tek mbikalimi i Shkozetit. Ai po ashtu akuzohet për vrasjen e mikut të tij Elton Cico, më 1 maj 2016 si dhe për dhunë fizike ndaj ish të dashurës Xhisiela Maloku. Ngjarje kjo që u përfol shumë në media dhe krijoi një impakt të madh në opionin e publikut.