Një ngarkesë prej 400 kilogramë kokainë, është sekuestruar në Lipjantë Kosovës mesditën e së hënës në një kamion që mbante produkte mishi. Fillimisht gjatë kohës kur peracioni ishte në zhvillime e sipër u raportua për një sasi prej 2.2 ton kokainë. Por Bahri Shala, kreu i Drejtorisë së Antidrogës ka deklaruar se sasia e kapur e kokainës është 300-400 kilogramë. Sipas të dhënave mësohet se vendi ku është sekuestruar kokaina është në hyrje të qytetit të Lipjanit në afërsi të stacionit të zjarrfikësve. Kamioni me targë 01 263 ODME ku u gjet edhe sasia e kokainës mësohet se ka qenë fillimisht në Durrës dhe më pas ka kaluar përmes pikës kufitare të Vermicës, ndërsa nuk dihet se cili ka qenë destinacioni përfundimtar i tij dhe kush fshihet pas kësaj sasie të madhe droge. Operacioni u krye në bashkëpunim me policinë shqiptare, kosovare dhe atë italiane, ku pala shqiptare për 15 ditë e kishte mbajtur në vëzhgim që nga ardhja në portin e Durrësit. Por DEA amerikaneka koordinuar gjithçka në operacion pasi kishin informacion që në origjinë për ngarkesën në fjalë duke i vendosur GPS për të parë se ku do të shkonte. Vlera e kokainës së sekuestruar kap shifrën rekord të 6 miliard eurove. Kjo është sasia më e madhe e drogës që ka kaluar ndonjëherë në Portin e Durrësit. Autoritetet shqiptare kishin dy muaj që prisnin këtë ngarkesë, pasi u sinjalizuan nga DEA amerikane. Me të mbërritur kontejneri në Durrës, policia shqiptare ka konstatuar drogën, por nuk ka ndërhyrë duke e lejuar që të kryheshin procedurat për të zbuluar se cili ishte destinacioni final. Pasi kanë kryer procedurat, autoritetet e kanë ndjekur kamionin me kontejnerin sipër, i cili është nisur për në Kosovë. Në këtë moment është njoftuar edhe policia e Kosovës, e cila ka ndërhyrë duke bërë edhe sekuestrimin e sasisë së madhe të drogës. Kjo është hera e tretë e kapjes së një sasie të madhe me kokainë që lidhet me portin e Durrësit. Më herët në Prill u kapën 143 kg kokainë në Portin e Durrësit, ndërsa po ashtu u kapën edhe në 1 prill një tjetër sasi prej 49 kg kokainë, në pronësi të Selim Çekajt, babait të Arbër Çekajt ky i fundit i dënuar për trafikimin e 613 kg kokainë.