Presidenti francez Emmanuel Macron të enjten bëri thirrje për bashkëpunim të ngushtë mes Evropës dhe SHBA-së në përpjekjet për t'i dhënë fund luftës në Ukrainë me kushte të pranueshme nga Kievi. Macroni foli në Varshavë pas një takimi me kryeministrin polak Donald Tusk. "Ne duhet të punojmë shumë ngushtë me amerikanët dhe, natyrisht, me Ukrainën për të gjetur një mënyrë që merr parasysh interesat e Ukrainës, sovranitetin e saj, si dhe interesat e evropianëve dhe sigurinë e tyre”, tha Macron. Ai foli në mbështetje të "një paqe të negociuar nga ukrainasit dhe që u ofron atyre siguri tëqëndrueshme”. Macron vuri në dukje gjithashtu rëndësinë e koordinimit mes vendeve evropiane në formulimin e garancive të sigurisë për Ukrainën pas një marrëveshjeje të mundshme paqeje me Rusinë. Përfaqësuesit e disa vendeve të NATO-s kanë zhvilluar bisedime konfidenciale për javë të tëra se si mund të monitorohet një armëpushim i mundshëm i ardhshëm në Ukrainë. Franca dhe Britania e Madhe po përgatisin plane për një koalicion vullnetarësh që do të monitoronte ushtarakisht një armëpushim të mundshëm atje. Që nga fundi i vjeshtës, Macron ka udhëtuar në Britaninë e Madhe, Skandinavi dhe në Shtetet Baltike për të gjetur partnerë për këtë trupë. Presidenti francez ka deklaruar se një prani e tillë mund të bëhet e nevojshme edhe nëse forcat e armatosura ruse çajnë linjat ukrainase dhe i detyrojnë mbrojtësit të tërhiqen. Donald Tusk konfirmoi se mundësia e dërgimit të një kontigjenti ushtarak në Ukrainë ishte ngritur në takimin e tij me Emmanuel Macron, por saktësoi se "për momentin" Varshava "nuk parashikon asnjë veprim të këtij lloji". Kjo ide është ngritur që në shkurt nga presidenti francez, por nuk kishte fituar terren. Mediat polake e kanë shtjelluar ndërkohë këtë ide duke nënvizuar se një mision i tillë mund të përbëhet nga pesë brigada me një total prej rreth 40.000 ushtarësh. Polonia mund të marrë komandën e njërës prej tyre.