Policia e Tiranës ka finalizuar operacionin e koduar “Rrjeti”, duke goditur një grup kriminal të dyshuar për shitje armësh zjarri, lëndësh plasëse dhe municioni. Në kuadër të aksionit janë arrestuar katër persona, ndërsa dy të tjerë janë shpallur në kërkim. Gjatë operacionit u sekuestruan 7 armë zjarri, konkretisht 4 pistoleta dhe 3 automatikë, si edhe municion luftarak dhe prova të tjera materiale. Të dyshuarit janë identifikuar përmes blerjeve të inskenuara nga uniformat blu, metodë që ka shërbyer për vërtetimin e aktivitetit të paligjshëm. Sipas hetimeve, gjashtë personat e identifikuar në këtë fazë të operacionit, së bashku me pesë të arrestuar më herët, dyshohet se vepronin të organizuar në dy grupe kriminale që siguronin dhe shisnin armë në zona të ndryshme të kryeqytetit. Pistoletat shiteshin deri në 1.500 euro, ndërsa automatikët kallashnikov deri në 2.500 euro. Hetimi kishte nisur më herët dhe në mars të këtij viti çoi në arrestimin e pesë personave të tjerë. Në total, gjatë operacionit “Rrjeti”, janë arrestuar 9 persona dhe janë sekuestruar 17 armë zjarri, 4 kallëpë lëndë plasëse, sasi të konsiderueshme municioni, 4 automjete dhe 13 telefona celularë. Policia bën të ditur se hetimet vijojnë për identifikimin e personave të tjerë të përfshirë dhe për kapjen e dy të shpallurve në kërkim.