Shqipëria ka përmbyllur me sukses operacionin e radhës për riatdhesimin e shtetasve shqiptarë nga kampi Al-Hol në Siri. Në total numri i tyre ka shkuar në 38, pasi në 3 operacionet e para janë shpëtuar 25 gra e fëmijë. Prej vitesh vuanin në kampin e ferrit Al-Hol në Siri, por tashmë janë të sigurt në duart e utoriteteve shqiptare. Shumë shpejt, 13 shtetasit e shpëtuar do të mbërrijnë në atdhe së bashku me kreun e Antiterrorit të Shqipërisë Alban Dautaj, I cili ka bashkëpunuar me zyrtarë të lartë sirianë. 3 operacione të tjera janë zhvilluar përgjatë viteve të kaluara, ku janë shpëtuar 25 persona, për të cilët erdhi fundi I vuajtjeve. Më 1 gusht të 2021-shit në Shqipëri mbërritën 5 gra dhe 14 fëmijë, të cilët prej vitesh ndodhin në kampin famëkeq. Ata ishin nga Tirana, Dibra e Librazhdi, ndërsa u nisën me një çarter të qeverisë shqiptare nga Libani drejt aeroportit Nënë Tereza. Asokohe kryeministri Edi Rama e konsideroi operacionin e shpëtimit, ndër më të vështirët e kryer, por duke premtuar se nuk do të qe i vetmi.