Tre vjet më parë Ilir Meta u votua në Kuvend dhe u ngjit në fronin presidencial përmes një ceremonie që është bërë tashmë traditë në Shqipëri, ku marrin pjesë përfaqësuesit më të lartë të Qeverisë shqiptare dhe trupit diplomatik të akredituar në Shqipëri. 24 korriku është dita e ndërrimit të postit presidencial. Por sa të frytshme kanë qenë këto tre vite të qëndrimit në karrigen e kreut të lartë të shtetit nga ana e Metës? Në gati 40 muajt e Presidencës, Ilir Meta nuk ka dekretuar plot 37 ligje, që janë dërguar nga Parlamenti dhe kanë qenë ligje të miratuara me shumicën e votave parlamentare. Madje, disa edhe me prezencën e asaj opozite që vendosi të djegë mandatet, duke ua lënë vendin opozitarëve të rinj. Por cilat janë disa nga ligjet e pa dekretuara nga Meta? Një prej tyre ai për disa shtesa në “Qeverisjen Vendore”. Më pas ligji për materialet e Rezervave të Shtetit, ku bëhet fjalë për pasuritë e Shqipërisë që nga floriri e deri tek ato me vlera më të vogla. Një tjetër ligj për të cilin pati mjaft debat ishte ai për “Shembjen e Teatrit Kombëtar”, “Për Nënshtetësinë”, Pasuritë e paluajtshme dhe “Për Zhvillimin Rajonal dhe Kohezionin”.