Prej tre ditësh vijon të jetë aktive një vatër e madhe zjarri në masivin pyjor Lofkënd- Drenie- Vlosh, në territorin e bashkisë Mallakastër. Sipas informacioneve flakët kanë përfshirë një sipërfaqe prej 30 deri në 35 hektarë pyje dhe shkurre. Përgjegjësi i sektorit të mbrojtjes civile pranë Prefekturës Fier, Kreshnik Ymeraj bëri me dije se në terren po punojnë 5 mjete zjarrfikëse, 25 efektivë të MZSh-së, 25 të Forcave të Armatosura dhe 25 punonjës të strukturave bashkiake. Ndërhyrja po zhvillohet në një terren të vështirë malor, gjë që ka vështirësuar përpjekjet për izolimin dhe shuarjen e flakëve. Për shkak të përmasave të zjarrit dhe kushteve të vështira, autoritetet kanë paralajmëruar se është e nevojshme edhe një ndërhyrje nga ajri për neutralizimin e plotë të vatrës.