Gjatë 24 orëve të fundit në vend janë raportuar 33 vatra zjarri, 8 prej të cilave vijojnë të jenë aktive, ndërsa 5 të tjera nën monitorim. Për menaxhimin e situatës janë angazhuar 535 forca operacionale dhe 51 automjete zjarrfikëse. Në terren janë përfshirë edhe Forcat e Armatosura me 100 efektivë, 2 automjete zjarrfikëse, 3 helikopterë dhe 2 avionë Air Tractor. Aktualisht operojnë 120 forca ushtarake, 2 helikopterë dhe 2 avionë Air Tractor. Një nga vatrat kryesore vijon në Malin e Dajtit, në Tiranë, ku operojnë forca zjarrfikëse dhe të forcave të armatosura, të mbështetura nga dy helikopterë të Forcës Ajrore. Sipas Ministrisë së Mbrojtjes, nuk ka rrezik për zonat e banuara. Vatrat në Priskë dhe Vakumone janë nën kontroll dhe po monitorohen. Në Gurë-Lurë të Dibrës hapja e korridoreve në terren ka ndihmuar në frenimin e përhapjes së zjarrit drejt zonave të banuara, ndërkohë që vijon operacioni me forca bashkiake, policore, zjarrfikës, vullnetarë dhe 50 efektivë të Forcave të Armatosura, të mbështetur nga dy avionë Air Tractor.