Gjatë muajit maj të këtij viti, në qarkun e Shkodrës janë regjistruar 213 vepra penale, 34 më shumë se një muaj më parë. Sipas Policisë, janë identifikuar 199 autorë, ndërsa 33 persona kanë përfunduar në pranga, 161 janë proceduar në gjendje të lirë dhe 5 të tjerë janë shpallur në kërkim. Një pjesë e mirë e goditjeve kanë qenë në fushën e narkotikëve, lojërave të fatit, krimeve ekonomike dhe kapjes së personave të kërkuar, teksa kultivimi i kanabisit vijon të mbetet një nga problematikat kryesore në qark. Vetëm gjatë majit janë zbuluar 17 raste të kultivimit të bimëve narkotike. Shqetësim mbetet edhe siguria rrugore. Gjatë muajit maj janë evidentuar 35 raste të drejtimit të mjeteve në kundërshtim me rregullat, duke çuar në arrestimin e 10 drejtuesve. Në të njëjtën periudhë janë regjistruar 4 aksidente me pasojë humbjen e jetës së 4 personave. Ndërkohë, me nisjen e sezonit turistik, policia ka shtuar kontrollet në pikat kufitare dhe në zonat bregdetare, veçanërisht në Velipojë.