Autoritetet turke kanë arrestuar 304 njerëz të dyshuar për lidhje me grupin militant, Shteti Islamik, gjatë një operacioni në 32 provinca, tha ministri i Brendshëm i Turqisë, Ali Yerlikaya, të premten. Shumica e të dyshuarve u kapën në tre qytetet më të mëdha të Turqisë, Ankara, Stamboll dhe Izmir, tha Yerlikaya. Ai shtoi se operacioni “Heronjtë-34” u mbajt njëkohësisht në gjithë vendin. “Ne nuk do të lejojmë asnjë terrorist të hapë sytë, për të siguruar paqe dhe unitet për popullin tonë. Ne do të vazhdojmë betejën me përpjekje të mëdha të forcave tona të sigurisë”, tha ai. MInistri publikoi edhe pamje ku shihej policia duke hyrë në disa banesa dhe duke futur të arrestuarit në automjete. Shteti Islamik, kishte marrë kontrollin e një të tretës së Irakut dhe Sirisë në vitin 2014. Edhe pse tashmë i mposhtur, ai vazhdon të kryejë sulme. Ky grup militant ka kryer sulme të shumta në Turqi, përfshirë atë në një klub nate më 1 janar 2017 në Stamboll, ku u vranë 39 persona. Autoritetet turke kanë rritur presionin kundër Shtetit Islamik dhe kundër militantëve kurdë në javët e fundit, pasi këta të fundit vendosën një bombë pranë ndërtesave qeveritare në Ankara më 1 tetor. Turqia ka kryer rregullisht operacione brenda vendit dhe në veri të Irakut kundër partisë së punëtorëve të kurdistanit, të cilën e konsideron organizatë terroriste.