Një 56-vjeçar është arrestuar në Vorë, pasi akuzohet se ka kërcënuar kushëririn e tij dhe familjarët e tij, me qëllim për t’i marrë shumën prej 300 mijë eurosh. Policia e Tiranës finalizoi operacionin e koduar ‘Mesazhi’, pas kallëzimit të shtetasit E. M, i cili kishte denoncuar se në portën e banesës së tij, në fshatin Gërdec, kishte gjetur një fishek dhe një letër me përmbajtje kërcënuese për jetën e tij dhe familjarëve. Pas hetimeve, specialistët e Komisariatit të Policisë Nr. 7, në bashkëpunim me Seksionin për Hetimin e Krimeve të Rënda dhe nën drejtimin e Prokurorisë, identifikuan dhe arrestuan autorin e dyshuar, A. M., 56 vjeç, banues në Vorë. Gjatë kontrollit të banesës së tij, policia sekuestroi municion luftarak, veshjet që dyshohet se janë përdorur gjatë ngjarjes, si dhe një aparat celular. Materialet procedurale i janë referuar Prokurorisë për veprat penale “Shtrëngimi me anë të kanosjes për dhënien e pasurisë” dhe “Mbajtja pa leje dhe prodhimi i armëve, shpërthyese dhe municionit”.