Drejtuesit e 19 agjencive të OKB-së dhe organizatave partnere shprehën zhgënjimin e tyre në një deklaratë të përbashkët, ku i bëjnë thirrje Izraelit “të përmbushë detyrimin e tij ligjor” për të dërguar furnizime mjekësore dhe ushqime, si dhe të ndihmojë operacionet humanitare në Gazë. Deklarata u bën thirrje edhe udhëheqësve botërorë të parandalojnë një katastrofë edhe më të keqe. “Sëmundjet janë të gjithëpranishme. Uria është pranë. Uji është me pikatore. Infrastruktura bazë është shkatërruar”, shkruhet në deklaratën e organizmave humanitare. “Prodhimi i ushqimeve është ndalur. Spitalet janë shndërruar në fusha beteje. Një milion fëmijë përballen me trauma të përditshme”-vijon ajo. Drejtuesi i operacioneve humanitare të OKB-së, Martin Griffiths, së bashku me drejtuesit e Programit Botëror të Ushqimit, Organizatës Botërore të Shëndetit, Fondit të OKB-së për Fëmijët etj, thanë se civilët palestinezë janë të zhvendosur, të traumatizuar, të uritur dhe me pak mbështetje. Deklarata e tyre vjen një ditë pasi Shtetet e Bashkuara vendosën veton ndaj një projekt-rezolute të Këshillit të Sigurimit ku bëhej thirrje për një armëpushim të menjëhershëm dhe ndërkohë që numri i viktimave palestineze po i afrohet 30 mijëve në gati pesë muaj luftime mes Izraelit dhe Hamasit. Lufta u shkaktua nga Hamasi me sulmin terrorist të 7 tetorit brenda territorit të Izraelit, ku zyrtarët thanë se u vranë 1200 persona. Rreth 250 të tjerë u morën peng dhe rreth 130 prej tyre vazhdojnë të mbahen në Gazë.