Është shumë më tepër se një stërvitje e thjeshtë ajo që NATO ka nisur në Norvegji. 15 ditë manovra, testime dhe prova. 30 mijë ushtarë janë dislokuar në vendin nordik, bashkë me 200 avionë dhe 50 luftanije të ardhura nga 27 shtete vende anëtare. Stërvitja ishte programuar në fakt prej kohësh por me erën e luftës që po fryn nga Rusia, padiskutim ajo merr një domethënie tjetër. Minimalisht, stërvitja mund të konsiderohet një demonstrim force dhe përgatitje për një konflikt të mundshëm. Për dy javë, ushtarët e angazhuar në Norvegji, do të bëjnë manovra në kushte klimaterike të vështira, në tokë, ajër dhe det... Stërvitja, jo më kot është quajtur ‘Cold Response 2022’, ose ‘Përgjigjia e ftohtë 2022’. Ajo synon të testojë se si norvegjia do të menaxhonte përforcimet e aleancës në tokën e saj në linjë me nenin 5 të traktatit të NATO-s që kërkon që vendet anëtare të vijnë në ndihmë të një anëtari tjetër nën sulm.