Të paktën 30 avionë ushtarakë amerikanë janë zhvendosur nga bazat në Amerikë, drejt Evropës gjatë tre ditëve të fundit, tregojnë të dhënat e gjurmimit të fluturimeve të shqyrtuara nga BBC. Avionët në fjalë janë të gjithë tankerë ushtarakë amerikanë që përdoren për të furnizuar me karburant avionët luftarakë dhe bombarduesit. Sipas Flightradar24, të paktën shtatë prej tyre, të gjithë KC-135, u ndalën në bazat ajrore amerikane në Spanjë, Skoci dhe Angli. Kjo vjen ndërsa Izraeli dhe Irani vazhdojnë të shkëmbejnë sulme, pasi Izraeli nisi një operacion të premten që tha se kishte si qëllim shkatërrimin e programit bërthamor të Teheranit. Nuk është e qartë nëse lëvizjet e SHBA-së janë të lidhura drejtpërdrejt me konfliktin, por një ekspert i tha BBC se fluturimet e avionëve tankerë ishin "shumë të pazakonta". Sipas tij, kjo sugjeron se SHBA po zbaton një plan emergjence për të mbështetur operacionet intensive luftarake në rajon, javët e ardhshme. Shtatë avionët e gjurmuar nga BBC kanë vazhduar udhëtimin që atëherë dhe sipas të dhënave të gjurmimit të fluturimit mund të shiheshin duke fluturuar në lindje të Siçilisë pasditen e së martës. Gjashtë nuk kishin destinacion të deklaruar, njëri zbarkoi në ishullin grek të Kretës. Lëvizjet e avionëve vijnë mes raporteve se SHBA-të kanë zhvendosur gjithashtu aeroplanmbajtësen USS Nimitz, nga Deti i Kinës Jugore drejt Lindjes së Mesme. Nimitz mban një kontingjent avionësh luftarakë dhe shoqërohet nga disa destrojerë me raketa të telekomanduara.