65 kontrollorët e trafikut ajror që pezulluan punën, duke paralizuar aeroportin e vetëm ndërkombëtar të vendit, kërkonin rikthimin e pagës në nivelet fillestare të 4.400 dollarëve, aq sa c`e kishin përpara një viti. Rrogat e tyre u përgjysmuan për shkak të pandemisë, por kontrollorët vendosën të mos e pranonin më këtë gjendje, e të hidheshin në veprim. Një lëvizje kjo pas të cilës ministrja Balluku pa një prapavijë politike, edhe pse vetë punonjësit e Albcontrol këmbëngulnin se situata po bëhej stresuese për ta, e kjo i shkaktonte vështirësi në punë. Se fundi, mesohet se paga e bollshme për standartet shqiptare, nuk ishte i vetmi privilegj që ata gëzonin. Kontrollorët, sipas raporteve në media, merrnin aktualisht 2.400 dollarë në muaj, teksa punojnë vetëm 17 ditë në muaj. Ata marrin 15 paga në vit, pasi pjesë e privilegjeve që gëzojnë janë edhe tre paga shtesë, e sipas përllogaritjeve, përpara pandemisë një kontrollor merrte në fund të vitit si bonus gati 13 mijë dollarë. Ata përfitonin dy kontrolle të plota mjekësore falas në vit, kanë kryer trajnime të ndryshme nëpër botë, ndërsa pushimet i kalonin në vende që përfshinin dhe ishujt ekzotikë. Kreu i Sindikatës së Pavarur të Kontrollit të Trafikut Ajror Armando Fezga, përgjegjësja e turnit Flora Ndreca dhe Muhin Mezini janë tre kontrollorët që u ndaluan nga policia me akuzën e shpërdorimit të detyrës për bllokimin e aeroportit të Rinasit. Ne rastin e tyre, provë janë konsideruar edhe bisedat me njëri tjetrin në Whatsapp ku diskutohej organizimi i grevës, edhe pse ata vetë e mohojnë një gjë të tillë.