"Cdo person që hyn në Kosovë duhet të posedojë certifikatën e vaksinimit me tri doza, ose edhe me dy doza, por edhe me një test PCR të 48 orëve të fundit. Nga kjo kërkesë përjashtohen ata që hyjnë tranzit, diplomatët e huaj, fëmijët nën 12-vjeç, e ata që kanë dëshmi mjekësore se përjashtohen nga vaksinimi”, thuhet në njoftim. Në këtë masë përjashtim bëjnë edhe shtetasit e Kosovës që s'kanë dy doza të vaksinës, por ata duhet të karantinohen në shtëpi për shtatë ditë. Në të gjitha institucionet publike, punonjësve do t'u kërkohet ҫertifikata e vaksinimit më te paktën dy doza. Ndalohet po ashtu veprimtaria e klubeve të natës dhe organizimi i festivaleve, koncerteve etj. Operatorët e transportit publik lejohen të punojnë duke shfrytëzuar 50 për qind të kapacitetit të mjeteve. Megjithatë, procesi mësimor do të zhvillohet me prezencë fizike, ndërsa, në ambiente të mbyllura grumbullimet lejohen me maksimumi 30 persona. Sipas zyrtarëve të Ministrisë së Shëndetësisë, gjendja në spitalet e Kosovës mbetet nën kontroll dhe e menaxhueshme, por rreziku mbetet i lartë për shkak se varianti Omikron mbetet dominues. Numri i rreth tre mijë rasteve të infektimit në ditë u konfirmua pas më shumë se 11 mijë e 500 testeve, ku rreth 25 për qind e të testuarve dolën pozitiv, një rritje kjo shumëfish më e lartë krahasuar me dy javë më parë. Një rritje e tillë e numrit të të infektuarve nuk është shënuar nga muaji gusht i vitit të shkuar, kur Kosova u përball me situatën më të rëndë shëndetësore.