Që prej 9 marsit e deri më tani Shqipëria ka shënuar plot 27 javë me epideminë e covid 19, duke kaluar më shumë se gjysmën e vitit në bashkejetesë të plotë me virusin e shekullit, që ka bërë kërdinë në të gjithë botën. Java e kaluar shënoi edhe ditën me numrin me të madh të rasteve të reja në nivel botëror që prej fillimit të sëmundjes që u shëndrrua shumë shpejt në pandemi. Në 11 shator 2020 janë shënuar 310 mijë e 692 raste të reja në botë. Në botë më prekurit janë SHBA-të, Amerika e Jugut dhe Lindja e Mesme. Ndërsa fatalitetet në botë dominohen nga Amerika Latine, vendet e Europës Perendimore dhe SHBA-të. Në Europë rastet pozitive kanë një shtrirje të gjerë gjeografike. Në ndryshim nga dy-tre muajt e parë të pandemisë, ka shtrirje edhe në Europën Lindore. Kjo rrëzon perceptimin e krijuar fillimisht se vendet e ish – bllokut komunist kanë një përhapje më të ulët sepse kanë patur dikur një mbulim më të mirë vaksinal.