Një stuhi e egër është përplasur mbi pjesën jugore dhe atë të brendshme të Gjermanisë natën e shkuar, e shoqëruar me reshje të dendura dhe rrufe. Në landin e Hesenit janë regjistruar shira të jashtëzakonshëm dhe mijëra shkrepëtima. Në disa rajone ranë madje deri në 60 litra shi për metër katror. Si pasojë, bodrumet u mbushën me ujë ndërsa nëpër nënkalime u deshën ndërhyrje për të shpëtuar shoferët nga automjetet që lundronin në ujë. Aeroporti i Frankfurtit u bllokua për disa orë. 70 fluturime të vonuara apo të anuluara, kurse pasagjerët e ardhur nuk mund të largoheshin nga avionët. Për më shumë se dy orë u ndërpre lëvizja e pasagjerëve dhe transporti i valixheve në tokë, thuhet nga aeroporti. 23 fluturime të tjera u desh të ndërronin destinacion. Mijëra pasagjerë u prekën nga moti i keq, sipas të dhënave. Metereologët regjistruan në zonën e Rinit dhe Mainit 25.289 shkrepëtima në një orë. Më të prekur nga moti i keq ishin rajonet e Gelsenkirshenit, Raunheimit, Griesheimt, Hanaut etj. Skuadrat e zjarrfikësve në Frankfurt thanë se kryen gjatë natës 500 aksione shpëtimi, në landin e Renanisë Veriore dhe në Vestfali më shumë se 150 aksione. Në Gjermani pritet të vazhdojë edhe këto ditë moti i keq, me temperatura nga 22 deri në 29 gradë celcius ndërkohë që reshjet do të jenë të dendura.