Panorama e procesit të integrimit të Shqipërisë në Bashkimin Europian shihet si një rrugë suksesi nga mazhoranca, por nga opozita, si një proces që më shumë ka mbetur në letër sesa është përkthyer në mirëqënie për qytetarët. Kryenegociatorja Majlinda Dhuka gjatë një seance dëgjimore në komisionin e punëve të jashtme, u ndal në ligjet e miratuara, raportin IBAR dhe forcimin e shtetit të së drejtës. Dhuka: “Shqipëria ka miratuar 222 akte ligjore dhe nënligjore gjatë vitit 2025, ose rreth 3 herë më shumë krahasuar me 2024. Shqipëria ka marrë rekomandim pozitiv nga komisioni europian dhe aktualisht vazhdon diskutimi mes 27 vendeve anëtare në lidhje me raportin e progresit të shqipërsië dhe po diskutohen kushtet për mbylljen e negociatave për dy kapituj 23 dhe 24, dmth drejtësia dhe siguria. Shqipëria pret me interes të lartë përfundimin e diskutimeve nga vendet anëtare dhe marrjen e një vendimi lidhur me kushtet e mbylljes së negociatave. Kjo do i jepte vendit dritën jeshile për tu futur formalisht në fazën e mbylljes së negociatave.” Deputetët e opozitës ngritën shqetësime për mungesën e transparencës për procesin e integrimit, çështjen ‘Balluku’, fondet IPARD, ligjin për portet turistike dhe investitorët strategjikë. Vokshi: “Pyetja kryesore është: pse e mbani si sekret procesin, top secret procesi, nuk dihet as kush janë kushtet, çdo gjë ne e marrim nga komisioni, asgje nga qeveria shqiptare. As të ndërmjetmet, as hendeqet, zero informacion. A ju është komunikuar nga vendet anëtare që çështja Balluku është test kritik?”