Të paktën 21 persona janë vrarë dhe dhjetëra të tjerë janë plagosur ndërsa po shkonin për të marrë ushqime në një qendër për shpërndarjen e ndihmave në Rripin e Gazës, tha një spital fushor i Kryqit të Kuq dhe disa dëshmitarë. Dëshmitarët thanë se forcat izraelite hapën zjarr ndaj turmës së njerëzve që ishte afër 1 kilometër larg qendrës së ndihmës, që udhëhiqet nga një fondacion i mbështetur nga Izraeli. Ushtria izraelite ende nuk ka komentuar këtë ngjarje. Fondacioni tha përmes një deklarate se ka shpërndarë ndihma “pa asnjë incident” mëngjesin e së dielës dhe mohoi raportimet e mëhershme për kaos dhe të shtëna afër qendrave të ndihmës, që janë të vendosura në zona ushtarake izraelite, ku aksesi i pavarur është i kufizuar. Zyrtarët në spitalin fushor thanë se të paktën 21 persona janë vrarë dhe 175 të tjerë janë plagosur, por nuk treguan se kush hapi zjarr ndaj tyre. Një reporter i Associated Press raportoi se ka parë dhjetëra persona duke u trajtuar në këtë spital. Shpërndarja e ndihmave nga Fondacioni Humanitar për Gazën është shoqëruar me kaos dhe dhjetëra dëshmitarë kanë thënë se trupat izraelite kanë hapur zjarr ndaj turmave pranë qendrave të ndihmës. Para të dielës, të paktën gjashtë persona u vranë dhe më shumë se 50 të tjerë u plagosën, sipas zyrtarëve lokalë shëndetësorë. Fondacioni ka thënë se kontraktorë privatë të sigurisë ruajnë qendrat e tij dhe ata nuk kanë hapur zjarr ndaj turmave, ndërkaq ushtria izraelite e ka pranuar se ka hapur zjarr në raste të mëhershme.