21 organizata, sindikatash dhe koalicione të shoqërisë civile, u rreshtuan krah Partisë Demokratike dhe miratuan rezolutën “për mbrojtjen e të drejtave të njeriut dhe forcimin e demokracisë në Shqipëri.” Vendimi u mor gjatë një forumi të mbajtur më 18 dhjetor, ndërsa specifikohet nevoja për qeveri teknike. Këto organizata e cilësojnë si emergjentë nevojën për ngritjen e një qeverie teknike që të mundësojë një garë zgjedhore të lirë dhe të ndershme ndërsa marrin si shembull rastin e Maqedonisë së Veriut. Po ashtu aty thuhet se janë shkelur të drejtat dhe lirët e qytetarëve nga ana e qeverisë. . “Dënojmë shkeljet e vazhdueshme të raportuara të të drejtave të njeriut dhe standardeve demokratike në Shqipëri, përfshirë kërcënimet ndaj lirisë së shprehjes, manipulimet zgjedhore dhe gjendjen dramatike ne burgjet e vendit, 62 % e të burgosurve janë ne paraburgim, mungesën e transparencës në qeverisje.”, thuhet në rezolutën që u adresohet institucioneve kombëtare dhe ndërkombëtare, agjencive mbikëqyrëse, dhe mekanizmave të mbrojtjes së të drejtave të njeriut, me një apel të qartë për ndërhyrje dhe angazhim të menjëhershëm për të ndaluar këtë proces të rrezikshëm, sipas tyre.