Prokuroria e Posaçme vijon hetimet intensive në lidhje me 21 janarin. Pas marrjes në pyetje të ish ministrit të Brendshëm, Saimir Tahiri dhe të deputetit socialist, Xhemal Qefalia, këtë të hënë u paraqitën në SPAK dy protagonistë të tjerë të tragjedisë së 2011-s. Salvador Kaçaj, ish kryetari i Komunës së Shëngjinit, që në atë kohë ka protestuar ndaj Berishës dhe sot është përfaqësues i PD në Lezhë u pyet këtë të hënë për rreth 60 minuta. Rreth mesditës, në SPAK u paraqit ish deputeti socialist, Armando Prenga. Edhe ky i fundit deklaroi se është marrë në pyetje si protestues në lidhje me ngjarjen 13 viteve më parë. Veç 21 Janarit, përfaqësuesi i koalicionit ‘Bashkë Fitojmë’ në zgjedhjet vendore të majit të vitit të kaluar u vu në qendër të vëmendjes edhe për denoncimin e një atentati të dështuar, që sipas tij, iu organizua nga persona të paidentifikuar. Kaçaj publikoi në krah të Sali Berishës një video nga atentati i dyshuar.