Mbajti fjalimin e tij të zakonshëm me rastin e ndërrimit të viteve edhe presidenti rus Vladimir Putin. Ai e cilësoi 2023-shin si vitin e mbrojtjes së fuqishme të interesave të Rusisë dhe theksoi se vendi nuk do të tërhiqet kurrë, porn ë fjalimin e tij shmangu komentet për Ukrainën. “Ne e kemi dëshmuar shumë herë se mund të kryejmë misionet më të vështira dhe se nuk do të tërhiqemi kurrë sepse asnjë forcë nuk mund të na ndajë. Ne mbrojtëm fuqishëm interesat tona kombëtare, lirinë dhe sigurinë tonë, vlerat tona. Rusia po përjeton një fazë historike dhe vitin e ardhshëm do të jetë edhe më e fortë”, tha Putin në një fjalim televiziv, që për shkak të diferencave orare u transmetua fillimisht në lindje të Rusisë dhe më pas në rajone të tjera. Ndonëse Vladimir Putin nuk e përmendi drejtpërdrejt konfliktin në Ukrainë, i cili filloi pothuajse dy vjet më parë, ai aludoi vazhdimisht për të, teksa në jo pak raste përmendi nderimin për ushtarët, të cilët i quajti heronj të vendit. Por ndryshe nga viti i kaluar, kur presidenti ishte shfaqur i rrethuar nga ushtarë me uniformë, këtë herë ai deklaroi se viti 2024 do të jetë viti i “familjes” dhe kishte si sfond Kremlinin.