Bota po shënon njëra pas tjetrës rekorde temperaturash dhe kjo është një shenjë alarmuese e pasojave të ndryshimit të klimës që kombinuar me fenomenin El Ninjo, mund ta bëjë vitin 2023 më të nxehtin e regjistruar ndonjëherë. Për muajin qershor, temperaturat mesatare globale janë, deri më tani, pothuajse një gradë Celsius më të larta se vlerat përkatëse të regjistruara që nga viti 1979. Ekspertët e fushës theksojnë se këto temperatura mund ta bëjnë vitin 2023 vitin më të nxehtë të regjistruar, duke lënë pas vitin 2016 që mban deri më tani kurorën si viti më i nxehtë ndonjëherë. Ngrohja e shkaktuar nga djegia e karburanteve fosile pritet të përkeqësohet nga “El Niño”, një fenomen natyror në të cilin ngrohen pjesë të Oqeanit Paqësor, duke shkaktuar një rritje prej 0,1 deri në 0,2 gradë Celsius në temperaturën mesatare globale. Në një deklaratë javën e kaluar, Administrata Amerikane e Oqeanit dhe Atmosferës konfirmoi praninë e “El Nino”-s, ndërsa parashikoi gjithashtu përshkallëzim të vazhdueshëm deri në fillim të vitit të ardhshëm.