Mediat italiane kanë nxjerrë detaje të reja në lidhje me kapjen e 202 kilogramëve kokainë në dy zona të qytetit të Milanos dhe mënyrën se si ranë në pranga 3 shtetasit shqiptarë. Sipas mediave vendase, goditjet u bënë në rajonet e Monzës dhe Brianza, ndërsa lënda narkotike u zbulua brenda 4 makinave, që ishin parkuar në zonën e varrezave. Karabinierët sqarojnë se aksioni i parë u krye në varrezat komunale të Agratit, ku u gjetën 3 prej makinave të parkuara me 142 kg kokainë brenda, e poseduar nga dy prej shqiptarëve, përkatësisht 37-44 vjeç. Autoritet e Milanos bënë me dije se aksioni I dytë ndodhi ndaj një shqiptari të tretë, të cilit në një makinë me targa angleze, iu kap ngarkesa prej 60 kg kokainë, të cilën ia kishin dorëzuar dy shtetasit tjerë shqiptarë. Nga një vlerësim i përafërt, vlera e lëndës narkotike të sekuestruar në treg shkon në mbi 15 milionë euro.