Të paktën 20 palestinezë kanë humbur jetën në 24 orët e fundit në Rripin e Gazës nga operacionet e vazhdueshme ushtarake izraelite, teksa konflikti me Hamasin vijon që prej tetorit të vitit 2023. Zëdhënësi i Shërbimit të Mbrojtjes Civile në Gaza Mahmoud Bassal bëri të ditur se pesë persona u vranë nga një sulm ajror mbi një shkollë në Qytetin e Gazës, ndërsa tre të tjerë humbën jetën në një sulm tjetër pranë një shkolle ku strehoheshin të zhvendosur. Dhjetëra të plagosur, përfshirë fëmijë, u raportuan nga kjo ngjarje. Ndërkohë më herët grupi palestinez Hamas njoftoi se i ka dhënë një “përgjigje pozitive” propozimit më të fundit për armëpushim dhe lirimin e pengjeve, të ndërmjetësuar nga SHBA. Në një deklaratë zyrtare, Hamasi theksoi gatishmërinë për të nisur menjëherë një raund të ri negociatash. Një zyrtar palestinez i përfshirë në bisedime tha për BBC se grupi ka pranuar strukturën e përgjithshme të marrëveshjes, por ka kërkuar garanci që luftimet nuk do të rifillojnë nëse bisedimet për një zgjidhje përfundimtare dështojnë.