Një hartë e re tregon incidentet e shumta në të cilët dronët dhe raketat ruse kanë zbritur në territorin e NATO-s që nga fillimi i pushtimit të plotë të Ukrainës nga Vladimir Putin. Gazeta e pavarur Verstka vlerësoi rastet kur mbetjet e raketave dhe dronëve kishin rënë në vendet fqinje me zonën e konfliktit. Shumica e raketave dhe dronëve ishin rusë, megjithëse disa raportohet se janë lëshuar nga Ukraina. Në vitin e parë të luftës, mbetjet ranë në vendet fqinje 7 herë, 16 herë në 2023 dhe deri më tani këtë vit janë 11 raste të tilla, cka përbën gjithsej 34 raste në shtatë vende, sipas kanalit në Telegram në gjuhën ruse. Verstka tha se kishte pasur edhe 10 incidente në Moldavinë jo-anëtare të NATO-s, duke përfshirë territorin e Transnistrisë, ndërsa ishin edhe katër raste në Bjellorusi, lideri i së cilës, Alexander Lukashenko, është aleati më i ngushtë i Putinit. Por 20 incidentet e tjera ndodhën në pesë anëtarë të aleancës: tre në Bullgari, dy në Poloni, një në Letoni dhe një në Kroaci. Verstka tha se incidentet e tjera ndodhën në Rumani, që ndan një kufi 400 milje me Ukrainën dhe ka një territor që shtrihet disa qindra metra nga portet ukrainase në lumin Danub, që janë objektiva të shpeshta ruse. Kryeministri rumun tha se ishte i sigurt se shkeljet "do të vazhdojnë" dhe Bukureshti po shqyrton ligjet që do ta lejojnë atë të rrëzojë dronët që hyjnë në hapësirën e tij ajrore, në kohë paqeje. Neni 5 i aleancës përcakton se nëse një vend i NATO-s sulmohet, të gjitha vendet anëtare dalin në mbrojtje të tij, megjithëse deri më tani nuk ka akuza të drejtpërdrejta se Rusia ka marrë qëllimisht në shënjestër vendet aleate.